Van Goghetik Picassora. Thannhauser legatua

katalogoa

Eroa

Eroa (El loco), Bartzelona, ca. 1903–1904
Akuarela paper leun gainean, 32,8 × 23,2 cm
Thannhauser Bilduma, dohaintza, Justin K. Thannhauser 78.2514.40
Sinadurarik eta datarik gabea; goian eskuinean inskribatua, akuarela gris urdinxkaz: El Loco
Ezkutuaren ur-marka, koroarekin eta gandorrarekin¹, kontra­marka: GUARRO

Jatorria

Ricardo Viñes (1875–1943), Paris. Alphonse Bellier (1886– 1980), Paris, 1935erako jada; Bellierrengandik Alex. Reid and Lefévre-k eskuratua (A. J. McNeill Reid, jabea), Londres, 1935; Reidi R. J. L. [Jonathan] Griffin-ek erosia, 1935; [gordailuan Mayor Gallery-n (Fred Mayor, jabea), Londres, 1938ko otsaila-martxoa]; Griffini Theodore Schempp-ek erosia (1904–1988), Paris eta New York, 1942; Schemppen­gandik Justin K. Thannhauserrek eskuratua, New York, ca. 1943 (40192. zk.); Thannhauserrek Solomon R. Guggenheim Foundation-i legatua, New York, 1978, museoarentzako dohaintza-aginduaren , 1963, eta mailegu luzatuaren, 1965, arabera.

Lehenengo erakusketak

Boston, Museum of Fine Arts, Jonathan Griffin-en mailegu luzatu gisa bere erakusketa orokorrerako, 1939–1942 (ez zen katalogorik egin).
Boston, Museum of Fine Arts, Drawings and Prints by Picasso, 1940ko apirilak 26–ekainak 12 (ez zen katalogorik egin).

Materialak eta prozedura

Pablo Picassok, Parisen esploratutako isolamenduaren eta nostalgiaren gaiekin jarraituz, eskale bereziki dohakabea irudikatu nahi izan zuen 1903. urtearen hasieran Bartzelonara itzuli zenean. Eskale hura marrazki askotako gaia izan zen, baita 1904ko akuarela handi batekoa ere. Hemen dugun bertsio txikiago honetan, gizon ahul hau oinutsik dago eserita, zarpail jantzita, txakur axolagabe altzoan etzanda duen artean².

Picassok akuarela baino ez zuen erabili marrazki hau egiteko, azpian grafitozko prestakuntzarik gabe³. Guarro Casas fabrikatzailearen marrazki-papera hautatu zuen; paper artisauak egiten zituen fabrikatzaile hark, eta Bartzelonan zuen egoitza⁴. Handik urte askora Picassok paper-fabrika horrekin berarekin lan egin zuen zezen-buru baten ur-marka diseinatzeko: Fray Carlos José Delgado, La tauromaquia, ó, arte de torear XVIII. mendeko lanaren testua ilustratzen zuten eta 1959an argitaratu zituen grabatuen portfoliorako zen ur-marka hori. (JW)

[Itzulpena: Rosetta;
Egokitzapena: Guggenheim Bilbao Museoa]

Oharrak

1. Ezkutuaren eskuineko erdia baino ez da ikusten koroarekin eta gandorrarekin, orria moztuta dagoelako ur-markaren erditik. “a” letra xehea azpian ikusten da, jatorriz “1a” izango zenaren parte gisa. [itzuli]
2. El loco lan honetan aipatzen da: Christian Zervos, Pablo Picasso, 1. alea, Cahiers d’art, Paris; E. Weyhe, New York, 1932, 184. zk., 86. lamina (izen honekin: Eroa txakurrarekin [Le fou au chien], 1903); Pierre Daix eta Georges Boudaille, Joan Rosselet-ekin, Picasso: The Blue and Rose Periods; A Catalogue Raisonné, 1900–1906, ingeleserako itzulpena Phoebe Pool, New York Graphic Society, Greenwich, Connecticut, 1967), X.5. zk., 235.or., errepr. (izen honekin: El loco [Eroa txakurrarekin]). [itzuli]
3. Akuarelaren pigmentuak gardenak dira uhin laburreko irradiazio infragorriarekin, eta erreflektografiak ez zuen inolako marrazkirik erakutsi azpian. [itzuli]
4. Bahe biribileko papera zilindrodun makinetan egiten da eta ontzian egindako hari-paperaren zenbait ezaugarri lortu nahi ditu. [itzuli]

PDF-a JAITSI