Van Goghetik Picassora. Thannhauser legatua

katalogoa

Zuaboa

Zuaboa, Arles, ca. 1888ko uztailak 31–abuztuak 3
Kanabera-kalamua eta luma eta tinta grafito gainean, paper leunaren gainean, 31,9 × 24,3 cm
Thannhauser Bilduma, dohaintza, Justin K. Thannhauser 78.2514.23
Datarik gabea; eskuineko beheko angeluan sinatua, tinta marroiz:Vincent
Ez du ur-markarik

Jatorria

Artistak John Peter Russell-i (1858–1930) bidalia, Paris, Belle-Isle, eta Sydney; haren alaba Jeanne Jouve (jaiotza izenez, Russell; 1887–1948), Paris, 1930erako jada; Justin K. Thannhauserrek Jouve-rengandik eskuratua, Paris, eta, gero, New York, 1938 (40111. zk.); Thannhauserrek Solomon R. Guggenheim Foundation-i legatua, New York, 1978, museoarentzako dohaintza-aginduaren, 1963, eta mailegu luzatuaren, 1965, arabera.

Lehen erakusketak

Adelaide, National Art Gallery of South Australia, Exhibition of French and British Contemporary Art, 1939ko abuztuak 21–irailak 17, 139. zk.; orobat izan zen hemen: Melbourne, Lower Town Hall, 1939ko urriak 16–azaroak 1; Sydney, David Jones’s Art Gallery, 1939ko azaroak 20–abenduak 16.
Minneapolis, University Gallery, University of Minnesota, The Nineteenth Century: One Hundred Twenty-Five Master Drawings, 1962ko martxoak 26–apirilak 23, 119. zk. (izen honekin: Portrait of a Zouave); orobat izan zen hemen: New York, Solomon R. Guggenheim Museum, 1962ko maiatzak 15–ekainak 28.

Materialak eta prozedura

Vincent van Goghen Zuaboa marrazkia kontu handiz modelatu zuen egileak, uda hartan bertan baina lehenago margotutako zuaboen erregimentuko soldadu baten izen bereko koadroan oinarrituta (Vincent van Gogh, Zuaboa, 1888ko ekaina)¹.

Van Goghek John Peter Russell australiar artista eta lagunari (1858–1930) bidali zion Zuaboa, beste hamaika marrazkirekin batera (Txalupak Saintes-Maries-en, Arles, ca. 1888ko uztailak 31–abuztuak 3  eta Tarasconeko bidea, Arles, ca. 1888ko uztailak 31–abuztuak 3), 1888ko abuztuaren 3 baino lehen, hain zuzen ere².

Kolore faltsuko infragorrizko irudiak erakusten duenez, Van Goghek zehatz-mehatz aplikatu zuen tinta grafitozko azpiko marrazkiaren gainean, zuzenean, bereziki hazpegietan. Itxuraz, Van Goghek modeloaren berezko ezkerraldeko masailaren soslaian, kopetan eta ezkerreko begian soilik egin zituen grafitozko lerroen gaineko aldaketak. Grafitoa barreiatuta eta partzialki ezabatuta dago eremu horietan, baina kolore faltsuko infragorrizko irudian ikusten da, marka urdin modura.

Aurpegiko xehetasunetarako metalezko luma-mutur mehe bat erabili bazen ere ia esklusiboki, artistak kanabera-kalamua baliatu zuen hondorako eta zuaboaren jakaren eremu batzuetarako³. Seguru asko, jakako lerro zabalenak pintzelez amaitu zituen. (JW)

[Itzulpena: Rosetta;
Egokitzapena: Guggenheim Bilbao Museoa]

Oharrak

1. Zuaboen infanteria arineko unitateak Frantziako gudarostearen baitako taldeak ziren, eta lotura zuten ipar Afrikarekin, baina Frantziako beste eskualde batzuetan ere kokatuta egon ziren. Hemen iruzkindutako marrazkia F1482 (izen honekin: The Zouave: Head and Shoulders, 1888ko ekaina) eta JH1535 da. [itzuli]
2. Theo van Gogh-i idatzitako gutunean —1888ko uztailaren 31n Arlesen datatua— zera zioen Vincent-ek: “Lan asko egiten ari naiz Russell-entzat. Marrazki batzuk egin nahi nizkion nire prestalan margotuetan oinarrituak; ziur nago atseginez hartuko dituela, eta horrek, hala espero dut behintzat, tratua egitera gogatuko du”. Van Gogh-ek beste gutun bat idatzi zion Theo-ri handik egun batzuetara: “Prestalan margotuetan oinarrituriko 12 marrazki bidali dizkiot Russell-i”. Vincent van Gogh-ek Theo van Gogh-i idatzitako gutuna, Arlesen, 1888ko abuztuaren 3an edo inguru horretan. Leo Jansen, Hans Luijten eta Nienke Bakker, argit. In Vincent van Gogh: The Letters; The Complete Illustrated and Annotated Edition, Thames and Hudson, Londres, 2009, 4. alea, 204.–205. or, 652 gutuna, eta 4. alea, 208. or., 654 gutuna; online ere eskuragarri dago, argitalpen elektroniko batean, 2010eko abendua, www.vangoghletters.org. [itzuli]
3. Van Gogh-ek metalezko luma-muturraz egindako erabilera xeheago aztertuta dago hemen: Jeffrey Warda, “A Singular Line: Vincent van Gogh’s Drawings in Arles”, liburu honetan. [itzuli]

 

PDF-a JAITSI