Van Goghetik Picassora. Thannhauser legatua

katalogoa

Emakumea eta haurra

Emakumea eta haurra (Femme et enfant), Bartzelona, 1903
Conté ziria paper gainean, 33,8 × 23,2 cm
Thannhauser Bilduma, dohaintza, Justin K. Thannhauser 78.2514.37
Datarik gabea; behean eskuineko bazterrean sinatua, tinta marroiz: Picasso; behean eskuinean tinta beltzez inskribatua (artistak ez): D’Eugéne Carriére [sic]
Ur-marka ezkutuarekin eta koroarekin, kontramarka:
VILASECA

Jatorria

Santiago Laporta, Bartzelona; Laportarengandik Galerien Thannhauserrek eskuratua (Justin K. Thannhauser, jabea), Berlin eta Luzerna, 1932rako jada; Luzerna eta Berlin artean transferitua, ca. 1933ko apirilak 14 (1603 / 61348 inb. zk., “Frau m. Kind nach Carrière”); Justin K. Thannhauserri transferitua, Paris, eta, ondoren, New York, 1938ko ekainak 7 (40193. zk.); Thannhauserrek Solomon R. Guggenheim Foundationi legatua, New York, 1978, museoarentzako dohaintza-aginduaren, 1963, eta mailegu luzatuaren, 1965, arabera.

Lehenengo erakusketak

Zürich, Kunsthaus Zürich, Picasso, 1932ko irailak 11–urriak 30 (azaroak 13 arte luzatua), 258. zk. (izenburu honekin: Frau mit Kind nach Carrière, 1902).

Materialak eta prozedura

Pablo Picassoren Emakumea eta haurra (Femme et enfant) marrazki goibela Eugène Carrière (1849–1906) frantziar margolari sinbolistaren margolan batean oinarritu zen zuzenean, Artista emaztearekin eta bien seme Jean-Renérekin (ca. 1895)¹. Picassoren marrazkia egokitu egin zen arte garaikideari buruzko artikulu bateko ilustrazioa izateko El Liberal espainiar egunkariaren azalean, 1903ko abuztuaren 10ean. Emakumea eta haurra lanean ez da Carrière ageri: jatorrizko koadroan emaztearen berezko eskuinaldean zutik dago. Irudi hori alde batera utzita, litekeena da Picassok jatorrizkotik abiatuta marraztu izana lan hau, Parisen bizi zenean seguru asko, edo erreprodukzio batetik abiatuta egin izana, leialtasunez jarraitzen baitio margolanari².

Emakumea eta haurra lana conté ziriz egin zuen Picassok. Marrazkirako tresna komertzial hori pigmentu prentsatu eta buztinez eginda dago, eta barra txiki laukizuzenaren edo zilindrikoaren forma eduki ohi du³. Picassok barra laukizuzen baten mutur laua erabili zuen nagusiki marrazki honetan, mugimendu zuzen eta bertikalak eginez irudien inguruan eremu ilun eta belusatu beltzak sortzeko. Marrazkiaren goiko aldeko conté gailurrek conté ziri normal baten zabalera berdina dute. Beheko eremuan eta goiko eremuaren eskuinaldean presioa txikituz lortu zituen koadroan ikusten diren tonu argiagoak. Picassok, konturatu ere egin gabe, papereko ur-marka baten gainean kokatu zuen konposizioa; Carrièreren emaztearen buruaren alde banatara ikus daiteke. Igurtzi bat balitz bezala, VILASECA Espainiako paper-fabrikaren izena ikusgai gelditu zen, conté ziria eremu horren gainetik pasa zuenean, ur-markaren lerroak pixka bat hondoratzen baitira paperean. Fabrikaren marka, edo kontramarka, atzealdean irakurtzen da, ahoz behera jarrita. Carrièreren emaztearen oihal edo tunika tolestuan Picassok ebakiak egin zituen edo papera urratu zuen, lerro arinki diagonaletan. Ez dago argi testura eman nahi zion arropari edo papera argitu nahi zuen urraduren bitartez. Efektua ez dai ia antzematen ez bada handitzen edo ez bada ispilu-argiztapenaren bitartez behatzen. (JW)

[Itzulpena: Rosetta;
Egokitzapena: Guggenheim Bilbao Museoa]

Oharrak

1. Informazio bibliografikoa lan honetatik aterea: Vivian Endicott Barnett, The Guggenheim Museum: Justin K. Thannhauser Collection, Solomon R. Guggenheim Foundation, New York, 1978, 120–122. or. Emakumea eta haurra hemen aipatua: Christian Zervos, Pablo Picasso, 1. alea, Cahiers d’Art, Paris; E. Weyhe, New York, 1932, 134. zk., 66. lam. (izen honekin: Deux enfants [Two Children], 1902). [itzuli]
2. Barnett, Guggenheim Museum: Justin K. Thannhauser Collection, 122. or. [itzuli]
3. Ikusi Conté ziriari buruzko deskribapen zehatzagoa lan honetan: Karl Buchberg, “Seurat: Materials and Techniques”, in Jodi Hauptman, Georges Seurat: The Drawings, erak. kat., Museum of Modern Art, New York, 2007, 30-41. or.; Kimberly Schenck, “Crayon, Paper, and Paint: An Examination of Nineteenth-Century Drawing Materials”, in Jay McKean Fisher et al., The Essence of Line: French Drawings from Ingres to Degas, erak. kat., Baltimore Museum of Art eta Walters Art Museum, Baltimore, 2005, 65–66. or. [itzuli]

PDF-a JAITSI