Van Goghetik Picassora. Thannhauser legatua

katalogoa

Bi bainulari talde

Bi bainulari talde (Deux groupes de baigneuses), Cap d’Antibes, 1923
Luma eta tinta marroia paper leunaren gainean, 26 × 35,2 cm
Thannhauser Bilduma, dohaintza, Justin K. Thannhauser 78.2514.54
Datarik gabea; behean eskuinean sinatua, tinta beltzez: Picasso
Ez du ur-markarik

Jatorria

Galerie Paul Rosenberg-ek (Paul Rosenberg, jabea) artistarengandik erosia, Paris, 1924 edo 1925ean (856. arg. zk.); Galerien Thannhauserrek eskuratua, Berlin eta Luzerna, seguru asko Rosenberg-engandik, 1932ko abuzturako; transferitua Luzerna eta Berlin artean, ca. 1933ko apirilak 14 (inb. zk. 1585 / 61324, “zwei Frauengruppen”); Justin K. Thannhauserri transferitua, Paris, eta, ondoren, New York, 1938ko ekainak 7 (40182. zk.); Thannhauserrek Solomon R. Guggenheim Foundation-i legatua, New York, 1978, museoarentzako dohaintza-aginduaren, 1963, eta mailegu luzatuaren, 1965, arabera.

Lehenengo erakusketak

Paris, Galerie Paul Rosenberg, Exposition de cent dessins par Picasso chez Paul Rosenberg, 1927ko ekaina-uztaila,
seguru asko 61. zk.
Zürich, Kunsthaus Zürich, Picasso, 1932ko irailak 11–urriak 30 (azaroak 13 arte luzatua), 343. zk. (izen honekin: Zwei Frauengruppen, ca. 1926).

Materialak eta prozedura

Marrazki hau 1923ko udan egin zuen seguru asko Pablo Picassok, hondartzan, Cap d’Antibes-en zegoela¹. Aurreko lanean bezala, Hiru bainulari (Trois baigneuses, 1920), Picassok ur ertzean dauden irudi biluzi klasikoen eszena ugari sortu zituen, baina oso gutxitan irudikatu zituen bi talde zein bere aldetik enkoadratuta, marrazki honetan bezala². Hemen, mutur fineko luma eta tinta marroia erabili zituen; lerroak oso finak dira, eta segurtasuna adierazten dute, azpian arkatzez egindako marrazkiaren laguntzarik gabe. Paperaren gramajea ertaina da, ez du ur-markarik, eta ez da gehiegi ilundu.

X izpi bidezko fluoreszentzia-azterketak tintan kromoa zegoela identifikatu zuen, eta horrek adierazten du kromozko kanpetxe-tinta izango dela, seguru asko³. Azterketa zehatz baten bitartez ikusi zen tinta nahiko dentsoa dela eta hauskorra, krakeladura arrastoekin eta galera-eremu txikiekin. Ez dago argi tinta horri beste osagairik erantsi zitzaion. Sinadura beste tinta beltz batez eginda dago, Txinako tintaz ziurrenik. (JW)

[Itzulpena: Rosetta;
Egokitzapena: Guggenheim Bilbao Museoa]

Oharrak

1. Picassok Hotel du Cap hotelean hartu zuen ostatua, Frantziaren hegoaldean, Douglas Cooper-en arabera, lan honetan: Vivian Endicott Barnett, The Guggenheim Museum: Justin K. Thannhauser Collection, Solomon R. Guggenheim Foundation, New York, 1978, 156. or. [itzuli]
2. Hemen azaltzen den marrazki hau lan honetan aipatzen da: Christian Zervos, Pablo Picasso, vol. 5, Cahiers d’Art, Paris, 1952, 18. zk., 12. lam. Barnett, Guggenheim Museum: Thannhauser Collection, 156. or.; Zervos-ek adierazten du, 5. alea, 19. zk., modu berean enkoadratutako bi irudi talde azaltzen direla eta ileari eusten dion irudi berarekin, marrazki honetan eskuinean eserita dagoenaren antzera. [itzuli]
3. Sigmund Lehner, Ink Manufacture, 3. ed., Scott, Greenwood and Son, Londres, 1926, 69–73. or. Tintaren azterketak negatiboa eman zuen burdinazko ioietan (II), burdina adierazteko paper batekin (II). [itzuli]

PDF-a JAITSI