Edukira zuzenean joan

Van Goghetik Picassora. Thannhauser legatua

katalogoa

Kopa, pipa eta tabako-paketea 

Izenburua:
Kopa, pipa eta tabako-paketea 
Argitalpena:
Bilbao: Guggenheim Bilbao, 2018
Neurriak:
23 x 30 cm
Orrialdeak:
175 or.
ISBN:
978-84-95216-86-1
Lege gordailua:
BI-1416-2018
Erakusketa:
Van Goghetik Picassora. Thannhauser legatua
Gaiak:
Artelanak | Kolorea | Lan-prozesua | Teknika eta materialak
Teknikak:
Akuarela | Gouache | Puntillismoa
Artelan motak:
Pintura
Aipatutako artistak:
Picasso, Pablo

Kopa, pipa eta tabako-paketea (Verre, pipe et paquet de tabac), 1914
Akuarela, gouachea eta grafitoa paper leun gainean,
19,9 × 29,7 cm
Thannhauser Bilduma, dohaintza, Justin K. Thannhauser 78.2514.47
Datarik gabea; atzealdean sinatua, goian ezkerrean, grafitoz: Picasso
Ez du ur-markarik

Jatorria

M. Perel, Paris; Perel-engandik Galerie Jeanne Bucher-ek eskuratua (Jean-François Jaeger, jabea), Paris, 1947; Galerie Jeanne Bucher-i Paul Martin-ek erosia; Robert Lebel (1901–1986), New York eta Paris, ca. 1950 baino lehen; Lebeli Justin K. Thannhauserrek erosia, Nueva York, ca. 1950 (erregistro-fitxaren zk. 397; 40166. zk.); Thannhauserrek Solomon R. Guggenheim Foundationi legatua, New York, 1978, museoarentzako dohaintza-aginduaren, 1963, eta mailegu luzatuaren, 1965, arabera.

Materialak eta prozedura

Pablo Picassoren Kopa, pipa eta tabako-paketea natura hila artista Avignonen, Proventzan1, egondako garaikoa dela uste da. Adiskide zituen bi artistarengandik hurbil bizi zen han: Georges Braque eta André Derain (1880–1954), hain zuzen ere. Picassok Eva Gouel-ekin (1885–1915) bidaiatu zuen Avignonera, 1914ko ekainean, Lehen Mundu Gerrak eztanda egin aurretik2. Garai hartako beren lan kubista askotan, bai Braquek bai Picassok teknika puntillista erabili zuten, zeinaren bitartez kolorezko pintzelkada txikiek formak eta itzalak sortzen dituzten. Horrez gainera, tonu-aukera zabalagoa iradokitzen da kolore primarioak elkarren alboan jartzen direnean.

Litekeena da Picassok akuarela beltzeko lerroekin hasi izana konposizio intimo hau eta, gero, lerro horiek ezabatu izana, neurri batean. Gune batzuk oso agerikoak dira oraindik, esate baterako kristalezko koparen gaineko zirkulua, erdian eskuinean, eta koparen oinarri biribila. Behaketa zorrotzago batek erakusten du ezabatutako akuarelaren arrastoak daudela paper-orri osoan; akuarela ezin da ia ikusi, baina paperaren zuntzetan barrena sartuta dago. Akuarelaren puntu gorri eta horiak beste koloreak baino lehen aplikatu ziren, gorria gainjarri egiten baita ezabatutako akuarela beltzeko guneetan. Gero, Picassok, grafito biguneko arkatz bat erabili zuen aurretik akuarelaz egindako lerro asko indartzeko eta konposizioari trazu berriak eransteko. Grafitozko lerro nabarmen horiek infragorrizko erreflektografian beltz biziko trazu gisa ikusten dira, eta aurretik akuarelaz egindako lerroak, aldiz, zabalago ikusten dira eta gris tonu ahula dute irudi honetan.

Ondoren, akuarela urdin iluneko puntuak aplikatu ziren, eta, jarraian, gouache urdin argi opakuzkoak. Azkenik, gouache zuri opaku eta lodi bat edo, beharbada, tenpera aplikatu zen; horrela, pintura lehorreko aglomerazio handiak edo beste partikula batzuenak erantsi zituen. Azken horiek pintura zuriko eremu askotara erantsi dira, eta oso argi ikusten dira arraseko argipean. (JW)

[Itzulpena: Rosetta;
Egokitzapena: Guggenheim Bilbao Museoa]

Oharrak

  1. Vivian Endicott Barnett, The Guggenheim Museum: Justin K. Thannhauser Collection, Solomon R. Guggenheim Foundation, New York 1978, 143–144. or. Kopa, pipa eta tabako-paketea lan honetan aipatzen da: Christian Zervos, Pablo Picasso, 29. alea, Cahiers d’art, Paris, 1975, 69. zk., 28. lamina (izen honekin: Nature morte au paquet de tabac, 1914ko udaberria). [itzuli]
  2. Jane Fluegel, “Chronology” in Pablo Picasso: A Retrospective, argit.William Rubin, erak. kat. Museum of Modern Art, New York, 1980, 178. or. [itzuli]

PDF-a JAITSI