Van Goghetik Picassora. Thannhauser legatua

katalogoa

Mahaia leiho aurrean

Mahaia leiho aurrean (Table devant la fenêtre), 1922
Akuarela eta grafitoa paper berjuratu gainean, 14,1 × 11 cm
Thannhauser Bilduma, dohaintza, Justin K. Thannhauser 78.2514.51
Goian eskuinean sinatua eta datatua, grafitoz: Picasso / 2
Ez du ur-markarik

Jatorria

Galerie Simon (D.-H. [Daniel-Henry] Kahnweiler, jabea), Paris; Galerien Thannhauserrek (Justin K. Thannhauser, jabea) Kahnweiler-i erosia, Berlin eta Luzerna, 1929ko ekainak 25 (1330 / 9997 inb. zk., “Tisch vor Fenster”); Justin K. Thannhauserri transferitua (Amsterdametik barrena), Paris, eta, ondoren, New York, 1938ko ekainak 2 (40214. zk.); Thannhauserrek Solomon R. Guggenheim Foundation-i legatua, New York, 1978, museoarentzako dohaintza-aginduaren, 1963, eta mailegu luzatuaren, 1965, arabera.

Lehenengo erakusketak

Munich edo Luzerna, Galerien Thannhauser, 1923¹.
Zürich, Kunsthaus Zürich, Picasso, 1932ko irailak 11–urriak 30 (azaroak 13 arte luzatua), 323. zk. (izenburu honekin: Tisch vor Fenster).
Buenos Aires, Galería Müller (Justin K. Thannhauserrekin antolatua), Picasso, 1934ko urria, 25. zk. (izenburu honekin: Mesa ante la Ventana).
Adelaide, National Art Gallery of South Australia, Exhibition of French and British Contemporary Art, 1939ko abuztuak 21– irailak 17, 90. zk.; orobat izan zen hemen: Melbourne, Lower Town Hall, 1939ko urriak 16–azaroak 1; Sydney, David Jones’s Art Gallery, 1939ko azaroak 20–abenduak 16.

Materialak eta prozedura

Pablo Picassok Parisen edo Dinarden margotu zuen Mahaia leiho aurrean. Beauregard etxearen barruko eszena ugariren zirriborroak egin zituen Dinarden, hura alokatu eta bertan bizi izan baitzen bere familiarekin 1922ko udan (ikusi Picasso, Dinard, 1922)². Lehen Mundu Gerraren ondorengo klasizismoaren berpizkundeari erantzuteko corpus handia sortzen ari zen garaian (ikus Picasso, Emakumea besaulkian 1922)³, Picassok kubismotik bereizitako formak ikertzen jarraitu zuen, hemen aipatzen ari garen akuarela eta grafitozko marrazki fin honetan ikus daitekeen bezala.

Mahaia leihoaren aurrean gramaje txikiko paper berjuratuaren gainean egin zen, eta koaderno batetik erauzi zen, goiko bazterreko zuloek aditzera ematen dutenez. Pentsatzekoa da Picassok lehenbizi grafitozko arkatzez egin zituela konposizioaren osagai batzuk —besteak beste, mahaiaren gaineko arraina egunkari batean, mahaiaren gainean—, eta, gero, akuarelazko ur-kolore arinak aplikatu zituela oinarrizko hiru koloreetan, formak betetzeko. Urdin grisaxkako akuarela arindua erabili zuen perimetroaren inguruan eta erdigunetik hurbil. Akuarela lehortu zenean, arkatz bigun batekin errepasatu zuen konposizioa, eta grafitozko lerro biziagoak aplikatu zituen forma handiagoetan, beltz zilarreztatuaz, konposizioa orekatzeko helburuarekin. (JW)

[Itzulpena: Rosetta;
Egokitzapena: Guggenheim Bilbao Museoa]

Oharrak

1. Galerien Thannhauserreko erregistro komertzialen agiri baten arabera, Mahaia leihoaren aurrean lana zehaztu gabeko erakusketa batean erakutsi zen, Municheko edo Luzernako galerien sukurtsalean, 1923an. Ez dira erakusketa horren xehetasunak baieztatu. Materialsammlung Picasso, A077 artxiboa Galerien Thannhauser, Zentralarchiv für deutsche und internationale Kunstmarktforschung, Kolonia. [itzuli]
2. Marrazki hau lan honetan agertzen da: Christian Zervos, Pablo Picasso, 4. alea, Cahiers d’art, Paris, 1951, 432. zk., 179. lam. [itzuli]
3. Gerra ondoren, klasizismoaren berpizkundeari “ordenara itzultzea” esan zitzaion, eta 1926an argitaratutako Jean Cocteau-ren saiakera-liburu batean inspiratu zen. Ikusi gertaera horri buruzko informazioa kat. 45, 1. zk., ale honetan bertan. [itzuli]

 

PDF-a JAITSI