Edukira zuzenean joan

Artea eta Txina 1989 ondoren: Munduaren antzerkia

katalogoa

Yin Xiuzhen

Xiaorui Zhu-Nowell

Izenburua:
Yin Xiuzhen
Egilea:
Xiaorui Zhu-Nowell
Argitalpena:
Bilbo: Guggenheim Bilbao Museoa, 2018
Neurriak:
29 x 24 cm
Orrialdeak:
171
ISBN:
978-84-95216-84-7
Lege gordailua:
BI 238-2018
Erakusketa:
Artea eta Txina 1989 ondoren: Munduaren antzerkia
Gaiak:
Giza gorputza | Materialtasuna | Kultura eta globalizazioa | Talde-memoria
Artelan motak:
Eskultura | Instalazioa | Performance
Aipatutako artistak:
Yin, Xiuzhen

61 Nire arropa (My Clothes), 1995
Egurrezko kutxa paper itsatsiarekin, arropa, zementua eta brontzezko xafla, 38 × 67 × 44 cm; koloretako bideoa, soinuduna, 21 min 31 s. M+ Sigg Collection, Hong Kong, dohaintza

62 Hiri eramangarria: New York (Portable City: New York), 2003
Maleta, arropa erabilia, argia, planoa eta soinu-osagaiak, 88 × 148 × 33 cm irekita. Song Errui Collection, Pekin

 

1989 ondorengo ordena berriaren aldaketa globalek biziki eragindako artista txinatarren belaunaldikoa da Yin Xiuzhen. Pekinen jaio zen, eta olio-pinturan graduatu zen Hiriburuko Unibertsitate Normalean. 1994an pintura erabat baztertu eta kontzeptualismoa hasi zen lantzen, eskulturaren, instalazioaren, performancearen eta bideoaren bitartekoak konbinatuz. 1990eko hamarkadaz geroztik Txinatik kanpo ibili da bidaian eta lanean, eta ikuspegi kritiko berria hartu du globalizazioaren, urbanizazioaren eta gatazka geopolitikoen ondorioei buruz. Yinen lana barnekoia eta enigmatikoa da aldi berean; memoriak interpretazio kolektiboa zer eratan tankeratzen duen ikertzen du artistak bere lanean, eta, zehatzago, nola formulatzen duen gizarte modernoaren aldaketa iraultzaile eta sarritan bortitzen historia nahasia, bai Txinaren barruan, bai Txinatik kanpo.

Materialtasuna funtsezko osagaia da Yinen praktikan. Forma hibrido berriak sortzeko xedeaz, objektu erabiliak, baztertuak edo ahaztuak jasotzeko eta manipulatzeko prozesuen bitartez, memoria pertsonala baliatuz, memoria kolektiboaren alderdi programatikoak berregiten ditu. Materialen eta gorputzaren arteko erlazio estuek liluraturik, 1995ean ehunak lantzen hasi zen. Bere lehen obretako batean —Nire arropa (1995)—, Yinek hainbat hamarkadatako arropa jaso zuen, baita txikia zeneko jantzi batzuk ere, eta aitak oparitu zion larruzko kutxa batean ipini zituen denak. Gero zementua isuri zuen kutxan, barruan zegoen arropa zigilatuz, eta edukiak eta edukigailuak eratutako objektu solido bat eratu zuen horrela. Hutong batean jardun zen Yin —artista bizi zen Pekingo alderdiko arkitekturaren kale-zulo tipikoa da hutong bat—, eta obra bukatzeko, brontzezko xafla bat ipini zuen kutxan, honakoa zioena: “Hauxe da azken hiru hamarkadetan erabili dudan arropa; nire esperientziak, nire oroitzapenak eta denboraren aztarren fisikoak daramatza”1.

Ehunak —eta bereziki jantziak— jasotzeko Yinen prozesu ia obsesibo hori antolakuntza mnemoteknikoa baino gehiago da. Egileak ehunak konbinatzeko eta zizelkatzerako duen birtuosismoa bereziki esperimentala eta metodikoa da, eta, hala ere, emozio espresionistaren bizitasuna du. Zentzu horretan, haren obra aldendu egiten da, modu jostagarrian, memoria kulturalak edo XX. mendearen bukaera aldeko “artxiboaren gaitz” orokorrak, Jacques Derrida-k izendatu zuen bezala, sortzen zuen interesetik2. 2001ean, oraindik ere egiten jarraitzen duen Hiri eramangarriak (Portable cities) saila jarri zuen artistak abian: hiriaren hazkunde eta garapen bizkorraren esperientzia komunari emandako erantzun guztiz pertsonala da. Bere sorterria den Pekindik hasita, arropa erabiliari forma berriak eman zizkion Yinek, zituen berreskuraturiko maleta irekien barruan miniaturazko hiriak eraikitzeko. Hiri-paisaia bakoitza ardura handiz dago eskuz josia, eta plano bat eta soinu-osagai bat ditu erantsiak, artistak leku bakoitzaz duen oroitzapena islatzen dutenak. Pekingo maletarentzat, esate baterako, Peking Opera abesten zuten kaleko artistak grabatu zituen. Beste sentimentaltasun-geruza bat gehitzearren, sailerako erabilitako ehun guztiak hiri bakoitzeko egoiliarrengandik hartuak dira. Toki bakoitzaren gaineko ezagupen subjektiboa bertako biztanleen jantziekin konbinatuz, Yinek azaltzen du zer modutan itxuraldatzen duen oroitzapenak denboraren eta espazioaren esperientzia, eta nola erabil litekeen globalizazioaren efektu berdintzaileak bideratzeko, eta, era horretan, haiei aurre egiteko. —XZN [Xiaorui Zhu-Nowell]

[Itzultzailea: Rosetta;
Egokitzapena: Guggenheim Bilbao Museoa]

Oharrak

  1. Itzulpena egilearena da. [itzuli]
  2. Jacques Derrida, Archive Fever: A Freudian Impression, Eric Prenowitz (itzul.), Chicago: University of Chicago Press, 1998. [itzuli]

Erakusketa hautatuak

61            1995: Yin Xiuzhen, Pekin Arte Garaikideko Museoa, Arte eta Diseinuko Akademia Zentrala, Pekin. 1997: Immutability and Fashion: Chinese Contemporary Art in the Midst of Changing Surroundings, Kirin Art Space Harajuku, Tokio; Kirin Plaza Osaka; Mitsubishi-jishu Artium, Fukuoka, Japonia. 1999: Transience: Chinese Experimental Art at the End of Twentieth Century, Smart Museum of Art, University of Chicago; University of Oregon Museum of Art, Eugene, eta Hood Museum of Art, Dartmouth College, Hanover, New Hampshire. 2002: Guangzhouko Trienala: Reinterpretation: A Decade of Experimental Chinese Art (1990–2000), Guangdong Arte Museoa. 2016: M+ Sigg Bilduma: Forty Years of Contemporary Chinese Art, ArtisTree, Hong Kong

62            Hiri eramangarriak saila, 2001: Liang Sicheng Arkitektura Diseinuaren Bienala, National Art Gallery, Pekin. 2003: Home and Away: The New Globalism, Vancouver Art Gallery. How Latitudes Become Forms: Art in a Global Age, Walker Art Center, Minneapolis. 2004: Sydneyko Bienala: On Reason and Emotion, Museum of Contemporary Art Australia, Sydney. 2005: Follow Me!: Chinese Contemporary Art at the Threshold of the Millennium, Mori Art Museum, Tokio. 2008: All Inclusive: A Tourist World, Schirn Kunsthalle, Frankfurt. Our Future: The Guy & Myriam Ullens Foundation Collection, Ullens Center for Contemporary Art, Pekin. 2010: Dreamlands, Centre Pompidou, Paris. 2012: Yin Xiuzhen, Groninger Museum, Herbehereak; 2013an toki honetara eraman zuten erakusketa. Kunsthalle Düsseldorf. Skyscraper: Art and Architecture against Gravity, Museum of Contemporary Art, Chicago. 2013: Moskuko Bienala: More Light, Manege erakusketa-areto nagusia. 2015: Worlds in Contradiction—Areas of Globalization, Galerie im Taxispalais, Innsbruck, Austria

PDF-a JAITSI