Edukira zuzenean joan

Artea eta Txina 1989 ondoren: Munduaren antzerkia

katalogoa

[Rem Koolhaas, Harvard Graduate School of Design, Alain Fouraux]

Alexandra Munroe

Izenburua:
[Rem Koolhaas, Harvard Graduate School of Design, Alain Fouraux]
Egilea:
Alexandra Munroe
Argitalpena:
Bilbo: Guggenheim Bilbao Museoa, 2018
Neurriak:
29 x 24 cm
Orrialdeak:
171
ISBN:
978-84-95216-84-7
Lege gordailua:
BI 238-2018
Erakusketa:
Artea eta Txina 1989 ondoren: Munduaren antzerkia
Gaiak:
Arkitektura | Hirigintza
Aipatutako artistak:
Koolhaas, Rem

39 Rem Koolhaas eta Harvard Graduate School of Design
Hiriari buruzko proiektua 1: Aurrerako Jauzi Handia (Project on the City 1: The Great Leap Forward),

1996–97, ikerketa-proiektua eta argitalpena: Great Leap Forward, Chuihua Judy Chung, Jeffrey Inaba, Rem Koolhaas eta Sze Tsung Leong (arg.). Kolonia: Taschen, Cambridge, Massachusetts: Harvard Design School, 2001

40 Rem Koolhaas eta Alain Fouraux
The Guangdong Times Museumerako Diseinua (Design of The Guangdong Times Museum)
,
Guangzhou, 2008an egina, eta argitalpena: The Guangdong Times Museum, testua: Alain Fouraux. Argitalpena: Guangdong Museum of Art (Guangzhou) Guangzhouko bigarren Trienalaren inguruko gertaera gisa: Beyond: An Extraordinary Space of Experimentation for Modernization, 2005

 

Rem Koolhaas arkitekto, hirigile eta teorialariak Office for Metropolitan Architecture (OMA) sortu zuen 1975ean Londresen, eta, 1978an, Delirious New York: A Retroactive Manifesto for Manhattan argitaratu zuen. Azterlan horrek irauli egin zituen hirigintzako protokolo modernoak, kakofonia, jendetza eta inprobisazioa metodo gisa teorizatuz, eta datu sozialak, ekonomikoak eta teknologikoak txertatuz inguru eraiki garaikideari eta haren etorkizuneko zabalkundeei buruzko eztabaidetan. 1990eko hamarkadaren hasieran, Project on the City fundatu zuen Harvardeko Graduate School of Design-en; arkitektura, paisajismo eta hirigintzako ikasleek parte hartzen zuten ikerketa-proiektu hartan, eta mundu osoan zehar aldatzen ari ziren hiri-baldintzak ikertzeko xedea zuen. Txinako Perla Ibaiaren Deltari buruz lehen azterlana egin zuenetik (2001ean argitaratu zen, Great Leap Forward tituluarekin), Koolhaasen Project on the City egitasmoak azterlanak egin ditu gizarte garaikidean xehekako salmenta eta kontsumoa ikertuz (Harvard Design School Guide to Shopping, 2001), eta txostenak egin ditu Pekin, Lagos, Mosku eta Erromari buruz.

1996an Koolhaasek Perla Ibaiaren Deltaren (PID) gaineko azterlan bat zuzendu zuen; Txinako hego-ekialdeko kostaldeko bost hiri guztiz jendeztatuk osaturiko multzo bat da Perla Ibaiaren Delta deitua, eta “esparru ekonomiko berezi” gisa definitu zen 1980ko hamarkadaren hasieran. Era horretan, bide egin zitzaion Koolhaasek “munduan ordu arte inoiz ikusi ez zen maila eta abiada batean, garapenerako irrika geldiezina” zeritzonari1. Shenzhen-en eta Guangzhoun zentratuz —kalkulatzen zen hango biztanleak, bat eginda, hogeita hamasei milioira helduko zirela 2020an—, Harvardeko ikasleek landako azterketak, analisi estatistikoak eta txosten historikoak egin zituzten Perla Ibaiaren Deltako hiri-“laborategien” gainean: horien baitan, garapena lotsagabeki kapitalista gertatzen zen, egitura politiko sozialista baten barruan. Harvardeko ikerketa Great Leap Forward liburuan argitaratu zen; 709 orriko lanak saiakerak eta dokumentazioa jasotzen ditu, Koolhaasen definizio famatua lantzeko: “City of Exacerbated Difference” (Diferentzia biziko hiria)2. “Aurrerako Jauzi Handia” tituluak Mao Zedong-en 1958–62 urteetako politika sozioekonomiko katastrofikoari egiten dio erreferentzia; zenbait daturen arabera, neurri horiek berrogeita bost milioi lagunen heriotza eragin zuten, gosetearen, derrigorrezko leku-aldaketaren edo motiborik gabeko bortizkeriaren ondorioz. Amaiera zoriontsuagoa izango zuen garai hartan Koolhaas-ek Deng-en kapitalismo globalaren bertsioan zuen fedeak. Perla Ibaiaren Deltako “modernizazio-zirimolak, hiri-substantzia guztiz berri bat ekarriko zuen”3 eta “munduaren fabrika” bihurtuko zuen Perla Ibaiaren Delta4.

Perla Ibaiaren Deltari buruzko proiektua egin eta hamar bat urtera, 2005ean, Koolhaas Guangzhoura itzuli zen. Hou Hanru, Guangzhouko Bigarren Trienalaren zuzendari artistikoak, Hans Ulrich Obrist eta Guo Xiaoyan-ekin batera, museo bat sortzera gonbidatu zuen, plataforma alternatibo gisa jardun zezan bere Beyond: An Extraordinary Space of Experimentation for Modernization izeneko trienal ausartean. Guangdong Museum of Art-i loturik egongo zen Museo iraunkor bat diseinatzea zen haren proposamena, etxebizitzen dorre-multzo batean kokatuko zena. Eraikinaren jabea Times Property higiezinen enpresa zen, trienalaren tokiko sustatzailea. “Formarik gabeko museo bat” eraikitzeko ideiarekin heldu zen Koolhaas, eta bere programa teorikoa aplikatzeko asmoa zuen merkataritza, kultura eta hiri-bizitza soziala integratzeko ondo funtzionatuko zuten sistema organiko batean5. Era horretan, Guangdong Times Museum berez agertuko zen “diferentzia biziko” espazio baten gisa.

Times Propertyk museoa behe solairuko parkean ipintzeko asmoa zuen, baina Koolhaasek baztertu egin zuen plan hura, eta, haren ordez, ikaragarri gustatzen zitzaizkion bistekin eraikitzea proposatu zuen: zabaltzen ari zen hiriaren aurrean. Haren kezka nagusia zen etorkizuneko museoa herritarren zerbitzura egotea, ez bakarrik eraikin hartan itxita bizi zirenen zerbitzura. Modu bakarra zegoen hura lortzeko: museoa lehendik zegoen etxebizitza-eraikin batean ipini eta kaletik zuzeneko sarrera ipintzeko baimena lortzea. Dorrearen eraikuntza bukatua zegoenez gero, Koolhaas-ek, OMAko Alain Fouraux-ekin elkarlanean, eta NODEko Doreen Heng Liu-ren laguntzarekin, hemeretzigarren solairu bat erantsi zuen literalki eraikinari, museoa hantxe bertan eraikitzeko; bulegoak eta egoitza-espazio bat hamalaugarren solairuan ipiniko ziren, eta sarrerako halla behekoan. Era horretan, egituraren aldetik eraikineko egoiliarren eguneroko bizimoduan txertatzen zen museoa, hainbesteraino non igogailu bera erabiltzen baitzen artea nahiz erosketak garraiatzeko. Times Museumek ateak zabaldu zizkionean publikoari 2010ean, Houren aholkularitza eta zuzendaritzapean, ezaugarri haiexek taxutu zuten ondorengo komisariotza-programa. Gehiago funtzionatzen duelarik ekoizpen-leku, artisten egoitza eta zentro komunitario gisa, usadiozko erakusketa-areto baten gisa baino, museoak bertako nahiz nazioarteko profesionalak hartu eta gonbidatu ditu beren proiektuak sortzera, irudikatzera, eztabaidatzera eta haiek artearen munduko publiko gero eta ugariago bati erakustera; sorkuntza-nodo txiki bat da, Perla Ibaiaren Deltako 41.698 kilometro karratuko hiri-eremuan. —AM [Alexandra Munroe]

[Itzultzailea: Rosetta;
Egokitzapena: Guggenheim]

Oharrak

  1. Office for Metropolitan Architecture, Project on the City 1: Great Leap Forward proiektuari buruzko azalpena, OMAren webgunea, kontsulta: 2017ko urtarrilak 15. [itzuli]
  2. Rem Koolhaas, “Introduction: City of Exacerbated Difference©”, hemen: Great Leap Forward, Chuihua Judy Chung et al. (arg.), Kolonia: Taschen; Cambridge, Massachusetts: Harvard Design School, 28 or. [itzuli]
  3. OMA, Project on the City 1 proiektuari buruzko azalpena. [itzuli]
  4. Ikus PIDko hirigintzaren beste planteamendu bat, hemen: Guido Musante eta Doreen Heng Liu (NODE), “The Future of Mobility in the Pearl River Delta”, Audi Urban Future Initiative webgunea, kontsulta: 2017ko urtarrilak 15. Jatorrian hemen argitaratua: DOMUS, 960. zkia., 2012ko uztaila. [itzuli]
  5. Rem Koolhaas, hemen aipatua: Shen Ruijun, “A Report on the Times Museum, Guangzhou, China”, Asia Art Archive in America, 2012ko urtarrilak 23. [itzuli]

Erakusketa hautatuak

39            1997: Documenta, Kassel

40           2005: Guangzhouko Trienala: Beyond: An Extraordinary Space of Experimentation for Modernization

PDF-a JAITSI