Edukira zuzenean joan

Artea eta Txina 1989 ondoren: Munduaren antzerkia

katalogoa

Post-Sense Sensibility:
Alien Bodies and Delusion 

Anthony Yung eta Jane Debevoise

Izenburua:
Post-Sense Sensibility:
Alien Bodies and Delusion 
Egilea:
Anthony Yung eta Jane Debevoise
Argitalpena:
Bilbo: Guggenheim Bilbao Museoa, 2018
Neurriak:
29 x 24 cm
Orrialdeak:
171
ISBN:
978-84-95216-84-7
Lege gordailua:
BI 238-2018
Erakusketa:
Artea eta Txina 1989 ondoren: Munduaren antzerkia
Gaiak:
Giza gorputza | Artea eta emozioa | Erakusketak | Zentsura
Mugimendu artistikoak:
Arte Kontzeptuala
Artelan motak:
Argazkia | Instalazioa | Performance
Aipatutako artistak:
Liu, Wei | Qiu, Zhijie | Sun, Yuan | Yang, Fudong | Zheng, Guogu

Shaoyaoju egoitza-multzoa, Pekin (sotoa), 1999ko urtarrilak 9 eta 10

Artistak: hogeita bi artista, haien artean Chen Lingyang, Chen Wenbo, Feng Qianyue, Gao Shiming, Jiang Zhi, Liu Wei, Lu Lei, Qin Ga, Qiu Zhijie, Shi Qing, Sun Yuan, Wang Wei, Weng Fen, Wu Ershan, Xiao Yu, Yang Fudong, Yang Yong, Zhang Donghui, Zheng Guogu eta Zhu Yu

Komisarioak: Qiu Zhijie eta Wu Meichun

Argitalpena: argitalpen independenteko liburuxka, 1999, Wu Meichun-en eta Qiu Zhijie-ren saiakerekin, 54 orri (zenbakitu gabeak); ingelesez eta txineraz

 

Aldi labur batez, 1998 eta 2000 bitartean, izan ziren erakusketa batzuk Txinan artistek giza gorpuak, gorputzaren zatiak eta animalia bizi eta hilak erabili zituztenak, eta sortu zituzten batzuetan irrigarriak, nazkagarriak eta txundigarriak, eta, behin edo behin, guztiz hunkigarriak gertatzen ziren obrak. Ez da harritzekoa tabuak apurtu nahi dituzten esperimentu hauek artistek berek antolatutako eta finantzaturiko erakusketetan aurkeztea; oso iraupen laburreko erakusketak izaten ziren, eta atea itxita edo erdi itxita egiten ziren. Adibiderik muturrenekoei zuku galanta atera zieten komunikabideen zalapartak asko gogorarazten zuen Londresko Academy of Arts-en (1997) eta Brooklyn Museum of Art-en (1999) Charles Saatchik antolatutako Sensation erakusketak sortu zuena. Alabaina, Qiu Zhijie-k eta Wu Meichun-ek, zeinek bi urte eskas lehenago Image and Phenomena bideoarteko erakusketa garrantzitsua antolatu baitzuten, ez zuten halako osperik desiratzen Post-Sense Sensibility: Alien Bodies and Delusion antolatu zutenean. Aitzitik, arte garaikidean oro har ikusi zuten joera bati emandako zuzeneko erantzun gisa pentsatu zuten erakusketa.

Qiu eta Wu-rentzat, gauza aspergarria izatera heldu zen artea. Estrategia kontzeptual intelektualizatuegi batzuek murriztu egin zuten arteak duen gaitasuna erreakzio emozionalak eragiteko, erraietatik ateretako erreakzioak sorrarazteko; eta estimulu berri baten premia zeukan. Hala, “zentzuak astintzeko” eta “gogoari eraso egiteko” antolatu zuten Post-Sense Sensibility. “Pertzepzioaren intentsitatearen” garrantzia azpimarratu nahian, artista gazteak hautatu zituzten; gehienak hogei eta hogeita hamar urte pasa bitartekoak ziren, eta “esperientzia fisiologiko eta psikologikoaren behereneko mailan, maila oinarrizkoenean” zuzeneko erantzun pertsonala eta irudimenezkoa sorrarazten kontzentratu ziren1.

Post-Sense Sensibility 1999aren urtarrilaren 9an inauguratu zen Pekineko egoitza-eraikin bateko soto alokatu batean. Bi egunez luzatu zen, eta zentsurarik ez zedin izan, publizitatea gutxienera murriztu zen. Komisarioek bi joera bereiztu zituzten obretan: “gorputz arrotzak” (“gorputz fisikoaren distortsioak” tituluarekin ere itzuli izan zen zenbaitetan), eritasunak edo akats biologikoak bezalako mutazio naturalen ondorioz sortuak, edo mutazio artifizialen ondoriozkoak, kirurgia estetikoak eta manipulazio genetikoak eraginak; eta “eldarnioa”, zeina baitzetorren “gogoaren mutaziotik”. Qiu-ren beraren azalpenaren ondorioz, “sendatzeko eta gaizkiaz libratzeko bitartekoa gertatzen da eldarnioa” “ilusio artistikoa bihurtzen denean”2.

Wang Wei-ren Segundo baten 1/30 urpean obran (1/30 Second Underwater) baziren, besteak beste, formatu handiko argazkiak, non gizon batzuk ageri baitira urpean murgilduta –harrapatuta?– hitz egiteko eta arnasa hartzeko borrokan. Wu Ershan-en Bilera lanean (Gathering), barazkien eta fruitu freskoen sorta estutuak armadura altu eta sendo bati lotuak daude, ahate, oilasko eta uso biziak bizi ziren paisaia emankor bat sortzeko. Haren Arte bisuala, erantsi olioa! Martxa, aurrera! (Visual Art, Add Oil! March Forward!) izeneko performancearentzat, plastikozko tanke militar txiki batzuk ogi-arrautzetan pasatu eta frijitu egin zituen Zheng Guogu-k. Obrarik eztabaidatuena Sun Yuan-en Eztia (Honey) instalazio latza izan zen. Ilunpetan zegoen gela batean, metalezko ohe bikoitz bat ipini zuen artistak, izotzezko blokez estalia, gizon baten gorpuaren burua zeukala erdian txertatua. Haren aldamenean, igurtziz kasik, hilik jaiotako ume txiki baten gorpu guztiz garatua zegoen. Erakusketako beste edozein piezak baino areago, eszena aztoratzaile baina samur hark Qiu-k eta Wu-k lortu nahi izan zuten efektua eskuratu zuen: ikusleen zentzuak astintzea.

[Itzultzailea: Rosetta;
Egokitzapena: Guggenheim Bilbao Museoa]

Oharrak

  1. Qiu Zhijie eta Wu Meichun, “Post-Sense Sensibility: Distorted Bodies and Delusion”, itzulp. Wu Hung eta Peggy Wang, hemen: Wu, Primary Documents, 273. or. Lehenik honela argitaratua: “Yixing yu wangxiang”, hemen: Wu Meichun eta Qiu Zhijie, Post-Sense Sensibility: Alien Bodies and Delusion/Hou ganxing: Yixing yu wangxiang, argitalpen independentea, Pekin, 1999, 1. or. Katalogoaren jatorrizko azpititulua Alien Bodies and Delusion bada ere, Wu Hung eta Peggy Wang-ek txinatar hitza “distorted” (“distortsionatuak”) itzuli zuten, eta ez “alien” (“arrotzak”). [itzuli]
  2. Ibid., 271. or. [itzuli]

PDF-a JAITSI