katalogoa
Alice Essington Nelson
Vivienne Roberts
- Izenburua:
- Alice Essington Nelson
- Egilea:
- Vivienne Roberts
- Argitalpena:
- Bilbo: FMGB Guggenheim Bilbao Museoa eta Editions du Centre Pompidou, 2021
- Neurriak:
- 22,5 x 30
- Orrialdeak:
- 350
- ISBN:
- 978-84-95216-93-9
- Lege gordailua:
- BI-01621-2021
- Erakusketa:
- Emakumeak abstrakziogile
- Gaiak:
- Emakumea artean | Generoa eta sexualitatea | Heriotza | Osiris | Artea eta estetika | Artea eta paisaia | Artea eta teknologia | Artea eta zientzia | Artea. Teoria | Artearen historia | Ibilbide artistikoa | Sorkuntza artistikoa | Sormena | Geometria | Espirala | Kolorea | Sinbologia | Londreseko Spiritualist Alliance | Society of Lady Artists | Society of Psychical Research | Espiritualtasuna | Kosmologia | Annie Besant | C. W. Leadbeater | Frederic Myers | William Essington | Automatismoa | Parapsikologia | Espiritismoa | Traszendentzia | Berdintasuna
- Mugimendu artistikoak:
- Arte Abstraktua
- Aipatutako artistak:
- Af Klint, Hilma | Essington Nelson, Alice
1846, Cheltenham, Gloucestershire (Erresuma Batua) – 1921, Hove, East Sussex (Erresuma Batua)
1895eko azaroan, Wilhelm Röntgenek X izpiak aurkitu eta Annie Besant eta Charles Leadbeater teosofoek kimika ezkutuari eta formak-pentsamenduaren teoriari buruzko beren gogoetak argitaratu zituzten garaian, Alice Essington Nelsonek, espiritualismoaren jarraitzailea zen artista ezezagunak, espiritualtasunean zuen fedea adierazteko bitarteko bat aurkitu zuen arte abstraktuan. Horrek frogatzen du ezen une hartan zientzia, esoterismoa eta artea bat zetozela ikusezina denaren irudikapen baten bila. Essington Nelsonen kontserbatu den obra bakarra enigma bat da. Society of Lady Artistsen erakusten zituen paisaia tradizionalekiko erabateko haustura bat ekarri zuen, elkarte hura baitzen arte ederrak ikasi zituzten emakumeen giro oro har onartua, eta bera haren parte zen. 1889an Society of Psychical Researcheko kide egin zen, eta, geroztik, London Spiritualist Alliancekoa. Ez da jakin zein arrazoirengatik egin zen bi elkarte horietako kide. Emakumeei gizonena bezalako estatus bat eskaintzen zien komunitate batek erakartzen ote zuen, emakumezko beste bazkide asko bezala, edo bere doluaren lasaigarri bat aurkitu ote zuen han? Essington Nelsonek umetxo bat galdu zuen William Essington Nelsonekin ezkondu eta beren hasierako ezkon bizitzan; William Essington musika irakaslea zen eta Fulneckeko Moraviar Elizako kolonian lan egiten zuen. Denborarekin, Alice Essington neskato batez erditu zen, baina handik gutxira senarra hil zitzaion. William Blakek aldez aurretik bezala, koloniako ohituretan egin zuen murgilaldi laburrak, non artea eta musika jarduera erlijiosoaren osagai baitira, eragina izango zuen, beharbada, bere obrarentzat orientazio espiritual bat bilatzerakoan.
Esanahi espiritual bat gogora ekartzeko, forma geometrikoez eta koloreen sinbolismoaz Essington Nelsonek egiten zuen erabilera batere ez konbentzionala ez zen berrikuntza bat. Georgiana Houghton eta haren adinkideak izan ziren aitzindariak, baina Essington Nelson harago joan zen, eta irudikapen mimetikoaren azken aztarnei uko eginez, sinbolizatzen duen unibertso metafisikoa bezain arte ohiz kanpoko bat eskaini zuen. Haren paletako oinarrizko tonalitateak, une hartako margoari buruzko konta ezin ahala teorien eraginez, ziur asko, planeten eraginarekin uztartzen dira. Horoskopo moduko bat da, karta astrologiko baten eskema klasikotik oso urruna, hala ere. Koloreek espiralen gainjartze harmoniatsuak sortzeko balio dute, espirala eboluzio kosmikoari atxiki ohi zaion sinbolo sakratu bat baita, baina, kasu honetan, indar espiritual pilpiragarri bat eguneratzen du, planetetako indarren eta giza jardueraren artean etengabeko lotura bat badelako sinesmen orokorraren frogagarri.
Zaila da jakiten ea Essington Nelsonengan zeinu kromatiko horiek sortzen ote diren ikuspen izugarri luzidoen itxuran edo indar ezezagun batek gidatzen ote duen. Baliteke Osirisen eragina erakutsiz (Shewing the Influence of Osiris) izenburuak Osiris artelanaren indar inspiratzaile gisa aipatzea. Osiris, haraindiko jainkosa egiptoarra, baliteke izatea orobat espirituen munduaren ebokazio sinboliko bat. Automatikotzat deskribatzen zuen Essington Nelsonek bere teknika, eta horrekin iradokitzen zuen ezen bere ahalmen espiritistek edo parapsikikoek orientatzen zutela bere sormen prozesua. Dohain horrek bere kide espiritualisten aintzat hartzea ekarri zion, baina adimenik eszeptikoenek bera barregarritzat tratatzeko arriskuan erori zen, inondik ere. Garai haietan Frederic Myersek uko egiten zion automatismoari, haren argudioaren arabera ez omen zetorrelako indar haragigabetu batetik, beste ni batengandik baizik.
Essington Nelsonek ekarpen bat egin zion arte abstraktuari, Houghton bezalako artista mediumek ekarritako arte espiritualistaren estetikaren aldekoa zen neurrian, gaur egun onartuta dagoena, Hilma af Klinti esker. Estetika funtsean femenino horrek espiritualtasunarekiko lotura pertsonal bat agerian jarri nahian du oinarria eta ez bakarrik hura aztertzen duten teorietan. Hamarkada askoan giro artistikoek ez ikusia egin bazioten ere, gaur iritsi da unea Essington Nelsoni artearen historian merezitako leku bat ematekoa.
[Itzulpena: Rosetta Testu-Zerbitzuak, SL]