Edukira zuzenean joan

Emakumeak abstrakziogile

katalogoa

Howardena Pindell

Lekha Hileman Waitoller

Izenburua:
Howardena Pindell
Egilea:
Lekha Hileman Waitoller
Argitalpena:
Bilbo: FMGB Guggenheim Bilbao Museoa eta Editions du Centre Pompidou, 2021
Neurriak:
22,5 x 30
Orrialdeak:
350
ISBN:
978-84-95216-93-9
Lege gordailua:
BI-01621-2021
Erakusketa:
Emakumeak abstrakziogile
Gaiak:
Emakumea artean | Generoa eta sexualitatea | Artea eta gizartea | Artea eta hezkuntza | Artea eta politika | Artea eta psikologia | Artea eta emozioa | Artearen historia | Ibilbide artistikoa | Sorkuntza artistikoa | Gardentasuna | Gainazala | Geometria | Kolorea | Lan-prozesua | Materiala | Sinbologia | Tamaina | Testura | Mihisea | Stony Brook University | Yale University | A.I.R. galeria | Museum of Modern Art (MOMA) | Gogoeta | Sentimenduak | Arrazakeria | Sexismoa | Zenbakiak
Mugimendu artistikoak:
Arte Abstraktua | Arte Kontzeptuala
Teknikak:
Collage
Aipatutako artistak:
Pindell, Howardena

1943, Filadelfia, (PA, AEB)

Howardena Pindellen artista-ibilbideak aniztasuna du ezaugarri: artista, erakusketa-komisarioa, irakaslea, militantea eta A.I.R. Gallery (Artists in Residence) emakumezko artisten lehenengo galeria kooperatiboaren sortzaile-kidea. Arte Ederretan lizentziatu zen Bostongo Unibertsitatean, eta diziplina bereko masterra egin zuen Yaleko Unibertsitateko Arte eta Arkitektura Eskolan. Lehenik eta behin, New Yorkeko MoMAko kontserbatzaile gisa egin zuen lan, hamabi urtez. Ondoren, eskolak eman zituen New Yorkeko Estatu Unibertsitatean, Stony Brooken, baina bere jarduera artistikoa (estudioan betiere) alde batera utzi gabe.

Pindellek 1970eko hamarkadan egin zituen lanak Arte Kontzeptualari eta Estrukturalismoari buruzko hausnarketa kritikoa dira. Koadrikula formatuari lehentasuna emanez —tamaina handikoa, ez oso lerrozuzena—, material bitxiak txertatzen zituen bere lanetan, hala nola ezkata distiratsuak, lurrina, kordela eta ispilutxoak, geruzatan banatutako konposizio xumeak eratuz. Serie-sorkuntza eta ehundura bereziko gainazalak dira haren lanaren ezaugarri nagusietako batzuk. Titulurik gabea (1971) adibide ezin hobea da zirkulutik abiatuta konposizio bat eraikitzeko duen modu pertsonalaz. Zulagailu arrunt baten laguntzaz zulodun txantiloi handi batzuk prestatu, eta hainbat pintura-geruza lainoztatzen zituen zuloetatik barrena, azalera koloreztatu gardenak lortzeko. Teknika zehatz hori, zirkulutik abiatuta sortuko zituen beste forma batzuen oinarri izan zena, da haren obra osoaren ardatza.

1979an, auto-istripu larria izan zuen, eta hura garrantzi handiko inflexio-puntua izan zen Pindellen bizitzan eta obran. Une hartatik aurrera, irmotasun handiz azaldu zituen arrazakeriaren, sexismoaren edo xenofobiaren inguruan zituen kezkak. Hurrengo urteetan egin zituen collageak, guztiz arrakastatsuak, autobiografiaren eta politikaren arteko halako uztarketa bat izan ziren. Margolan horietako batzuk zulagailuz egindako txantiloi zahar haien aztarnez beteta daude, eta zifra txikiak dituzte margotuta edo markatuta, eta mihise gainean itsatsita. Zirkuluak garrantzi sinboliko handia hartu zuen harentzat: aitarekin Kentuckyko root beer1 postu batean zegoela, pitxerren behealdeko marka (zirkulu gorri batzuk) ikusi zuen eguna gogorazten zion beti. Segregazio garaiko kontuak: zirkulu horiekin markatzen ziren pertsona beltzentzat ziren edalontziak2.

Bere sorkuntza-prozesuaren indar sortzaile ezinbestekoa bihurtu zuen Pindellek marka hura, trauma baten ikur zena. Haren metodoak, oso zorrotzak, suntsipenaren ondorio dira askotan: hala nola beste obra batzuetan erabilitako mihise zatiak, zulatutako txantiloiak edo collage-elementuak erabiltzeko ohitura, adibidez. Pindellek arlo pertsonala eta politikoa uztartzeko duen gaitasuna islatzen du estrategia horrek. Berreraikuntza, deseraikuntzaren bidez.

[Itzulpena: Rosetta Testu-Zerbitzuak, SL]

Oharrak

  1. Literalki, “sustrai garagardoa”, landareekin egindako edari gaseosoa, oso arrunta AEBetan [J.-F. Cornu itzultzailearen oharra].
  2. Valerie Cassel Oliver, “The Tao of Abstraction: Pindell’s 2. Meditations on Drawing”, hemen: Naomi Beckwith eta Valerie Cassel Oliver (ed.), Howardena Pindell: What Remains To Be Seen, erak. kat., Chicago, Museum of Contemporary Art Chicago/Múnich, DelMonico Books/New York, Prestel, 2018, 113. or.

PDF-a JAITSI