Edukira zuzenean joan

Emakumeak abstrakziogile

katalogoa

Helen Saunders

Bridgid Peppin

Izenburua:
Helen Saunders
Egilea:
Bridgid Peppin
Argitalpena:
Bilbo: FMGB Guggenheim Bilbao Museoa eta Editions du Centre Pompidou, 2021
Neurriak:
22,5 x 30
Orrialdeak:
350
ISBN:
978-84-95216-93-9
Lege gordailua:
BI-01621-2021
Erakusketa:
Emakumeak abstrakziogile
Gaiak:
Emakumea artean | Artea eta musika | Artea eta emozioa | Artea. Teoria | Artearen historia | Eragin artistikoa | Ibilbide artistikoa | Sorkuntza artistikoa | Geometria | Erakusketak | Penguin Club | Slade School of Fine Art | Doré Gallery | Historia | Lehen Mundu Gerra | Feminismoa | Blast aldizkaria | New York | Londres | Poesia | Jazz | Edward Wadsworth | Paul Cézanne | Vasily Kandinsky | Wyndham Lewis | Giza harremanak | Giza eskubideak | Suntsipena | Mugimendu sozialak
Mugimendu artistikoak:
Arts & Crafts | Post-Inpresionismoa | Vortizismoa
Teknikak:
Marrazkia
Artelan motak:
Freskoa | Pintura
Aipatutako artistak:
Saunders, Helen

1885, Londres (Erresuma Batua) – 1963, Londres (Erresuma Batua)

Rosa Waugh (1882–1971) artistaren eta (etorkizunean) militante sozialaren zuzendaritzapean hiru urtez ikasi ondoren, Helen Saunders, abokatu baten alaba, Slade School of Fine Artera joan zen bolada labur batez, Central School of Arts and Craftsen sartu aurretik. 1911tik aurrera, errenta xume bati esker bere kasa bizi ahal izan zen Londresen eta bere jarduera artistikoari eskaini ahal izan zion bere denbora guztia. Urte hartan bertan, Jorge V.a erregearen koroatzearekin batera, emakumeentzako sufragioaren aldeko manifestazio batean parte hartu zuen, eta garai hartan britainiar gobernuak espetxeratutako 700 sufragistetako bat ordezkatu zuen han.

1914an Saunders talde vortizistaren kide sortzaileetako bat izan zen. Vortizismoaren manifestua sinatu zuen, BLASTen lehenengo alean argitaratua, eta nahita aldatu zuen bere izenaren ortografia bere familia haserretu ez zedin, jendeak zer esango ote kezkatuta zeukanez. Aldizkariaren bigarren alea, 1915ean agertu zena eta non berak parte hartu baitzuen bi marrazki, poema bat, “Vision of Mud”, eta, ziur asko, eranskin bat argitaratuz, Chelsea auzoko haren etxebizitzatik banatu zen. Taldearen bi erakusketetan parte hartu zuen, Londresko Doré Galleryn, 1915ean, eta New Yorkeko Penguin Cluben, 1917an.

Saundersen izena maiz atxiki izan zaio Wyndham Lewisenari, Vortizismoaren liderrarenari, alegia. 1915eko amaieran Londresko Café de la Tour Eiffelerako egindako fresko sail batean parte hartu zuen; gaur egun suntsituta daude fresko horiek. Oraintsuko ikerketa batzuek aditzera ematen dutez, Lewisek egin eta 1921ean erakutsitako erretratu bat, Praxitella, Saundersen konposizio abstraktu handi baten gainean pintatuta zegoen, Atlantic City, 1915ean erakutsia eta BLASTen bigarren alean tintazko marrazki gisa erreproduzitua. Ez da jakin ea haren obrarik anbiziotsuenetako bat hark baimena emanda edo hark jakin gabe suntsitu ote zen.

Ikuspuntu artistikotik desadostasun handiak zeuden Saundersen eta Lewisen artean. Lewisek gizakiak sortutako materialekiko eta inguruneekiko atxikimendu bat erreibindikatzen zuen. Aitzitik, Sandersek mintzaira vortizistaren geometria dinamikora jo ohi zuen esperientzia intimoan sakontzeko. BLASTen lehenengo alean Kandinskyren Espiritualtasunaz artean berrikusiz, Edward Wadsworth pintore vortizistak gogora zekarren artistak zuen fedea “emozioen balioa(n), hura denez bultzada artistiko bakarra”; Sandersek bat egin zuen, nonbait, ideia horrekin, zeinak, adibidez, bere marrazkietako bat ilustratzen baitu, Dantza (Dance), non jazzeko erritmo berrien aurreko bere erreakzio sutsua irudikatu baitzuen.

Saunders, zeinak bere burua “izatez bakartitzat” definitu baitzuen, halako bakardade batean gerizatu zen Lehen Mundu Gerraren amaieran. Londresen geratu zen, eta pintatzen jarraitu zuen, eta Posinpresionismoari eta Cézanneren obrari atxiki zitzaion. Haren koadro gehienak galdu egin ziren 1940an haren etxebizitza suntsitu zuen bonbardaketan. Bere bizitzazko azken urteetan ia ez zuen erakusketarik egin, eta haren obra ez da gaur egun ere oso ezaguna.

[Itzulpena: Rosetta Testu-Zerbitzuak, SL]

PDF-a JAITSI